🌳🔥 GALICIA VOLVE SITUARSE Á CABEZA EN INCENDIOS FORESTAIS
A asociación Amigas das Árbores vén de facer pública unha reflexión crítica sobre a situación dos incendios forestais en Galicia, despois dos lumes rexistrados nas últimas semanas en concellos como Ponteareas, Carballo, A Laracha, Padrón, Teo ou Boborás, que xa deixaron centos de hectáreas afectadas antes mesmo do inicio oficial da época de máximo risco.
O colectivo lembra que a esta superficie queimada habería que sumar as arredor de 2.000 hectáreas tratadas mediante queimas prescritas realizadas pola Xunta de Galicia durante a primavera, dentro das actuacións coñecidas como “lume técnico” ou queimas controladas.
Segundo denuncia a entidade ecoloxista, as políticas de prevención continúan a ser a gran materia pendente da loita contra os incendios forestais. Amigas das Árbores cuestiona que, malia o incremento constante dos recursos destinados á extinción, os resultados segan a evidenciar unha elevada incidencia do lume nos montes galegos.
A asociación critica que as administracións continúen priorizando medios para combater os incendios unha vez iniciados fronte ás medidas destinadas a evitar que se produzan. Neste sentido, pregúntase polo destino dos máis de 225 millóns de euros destinados este ano á loita contra os lumes e reclama unha aposta decidida pola prevención activa, pasiva e interactiva.
Entre os exemplos que cita, destaca o caso do incendio do Paraño (Boborás), onde, segundo indica, baixo unha liña eléctrica afectada polo lume existían piñeiros de varios anos de crecemento, cuestionando o cumprimento das obrigas de mantemento das faixas de protección.
Amigas das Árbores conclúe que Galicia continúa inmersa nunha dinámica recorrente de incendios e insiste na necesidade dun cambio profundo nas políticas forestais, apostando pola prevención como principal ferramenta para protexer o territorio e os ecosistemas.
📌 Fonte: Amigas das Árbores (14 de xuño de 2026).
Desde Ecoloxistas Galicia Atlántica e Verde compartimos esta reflexión de Amigas das Árbores por considerala de interese para o debate público sobre a xestión forestal e a prevención dos incendios en Galicia.